டெல்லியை வீழ்த்தி இறுதிப் போட்டிக்கு நுழைந்தது கொல்கத்தா நைட் ரைடர்ஸ்

வெங்கடேஷ்  ஐயர், ஷுப்மான் கில் ஆகியோர் அபாரமான ஆட்டத்தை வெளிப்படுத்த, கொல்கத்தா நைட் ரைடர்ஸ் டெல்லி கேப்பிடல்ஸ் அணியை வீழ்த்தி இறுதிப் போட்டிக்கு நுழைந்தது.

ஐ.பி.எல். 2021 கிரிக்கெட்டில் 2 வது தகுதிச்சுற்று ஆட்டம் இன்று (13) நடைபெற்றது. இதில் டெல்லி கேப்பிடல்ஸ் – கொல்கத்தா நைட் ரைடர்ஸ் அணிகள் பலப்பரீட்சை நடத்தின.

நாணய சுழற்சியில் வென்ற கொல்கத்தா நைட் ரைடர்ஸ் முதலில் களத்தடுப்பை தேர்வு செய்தது. அதன்படி டெல்லி கேப்பிடல்ஸ் அணி சார்பாக தொடக்க வீரர்களான பிரித்வி ஷா (18), தவான் (36) ஆகியோர் ஓரளவிற்கு ஓட்டங்கள் அடித்தனர். அதன்பின் வந்த ஸ்டாய்னிஸ் 23 பந்தில் 18 ஓட்டங்கள் எடுத்து வெளியேறினார். ரிஷாப் பண்ட் 6 ஓட்டங்களிலும், ஹெட்மையர் 17 ஓட்டங்களிலும் ஆட்டமிழந்தனர்.

ஷ்ரேயாஸ் ஐயர் கடைசி வரை ஆட்டமிழக்காமல் 27 பந்தில் 30 ஓட்டங்கள் அடிக்க டெல்லி கேப்பிடல்ஸ் அணி 20 ஓவரில் 5 விக்கெட் இழப்பிற்கு 135 ஓட்டங்கள் எடுத்தது. கொல்கத்தா அணியில் வருண் சக்ரவர்த்தி 2 விக்கெட் வீழ்த்தினார்.

136 ஓட்டங்கள் அடித்தால் வெற்றி என்ற இலக்குடன் கொல்கத்தா நைட் ரைடர்ஸ் அணி களம் இறங்கியது.தொடக்க வீரர்களான ஷுப்மான் கில், வெங்கடேஷ் ஐயர் ஆகியோர் சிறப்பான ஆட்டத்தை வெளிப்படுத்தினர். இந்த ஜோடி முதல் விக்கெட்டுக்கு 12.2 ஓவரில் 96 ஓட்டங்கள் குவித்தது. அரைச்சதம் அடித்த வெங்கடேஷ் ஐயர் 41 பந்தில் 55 ஓட்டங்கள் எடுத்து ஆட்டமிழந்தார்.

அடுத்து ஷுப்மான் கில் உடன் நிதிஷ் ராணா ஜோடி சேர்ந்தார். அணியின் ஸ்கோர் 16 ஓவரில் 123 ஓட்டங்களாக இருக்கும்போது நிதிஷ் ராணா 12 பந்தில் 13 ஓட்டங்கள் எடுத்து வெளியேறினார். அப்போது கொல்கத்தா அணிக்கு 4 ஓவரில் 13 ஓட்டங்களே தேவைப்பட்டது.

ஷுப்மான் கில் 46 பந்தில 46 ஓட்டங்கள் எடுத்து ஆட்டமிழந்தார். கொல்கத்தா நைட் ரைடர்ஸ் அணிக்கு கடைசி இரண்டு ஓவரில் 10 ஓட்டங்கள் தேவைப்பட்டது.

19 ஆவது ஓவரை அன்ரிச் நோர்ஜே வீசினார். இந்த ஓவரில் 3 ஓட்டங்கள் கொடுத்து ஒரு விக்கெட் வீழ்த்தினார் நோர்ஜே. இதனால் கடைசில் ஓவரில் 7 ஓட்டங்கள் தேவைப்பட்டது.

அஷ்வின் கடைசி ஓவரை வீசினார். முதல் பந்தில் திரிபாதி ஒரு ஓட்டம் அடித்தார. 2 ஆவது பந்தில் ஓட்டம் பெறப்படவில்லை. 3-வது பந்தில் ஷாகிப் அல் ஹசன் ஆட்டமிழந்தார். 4 ஆவது பந்தில் சுனில் நரைன் ஆட்டமிழந்தார். இதனால் கடைசி 2 பந்தில் 6 ஓட்டங்கள் தேவைப்பட்டது. 5 ஆவது பந்தை திரிபாதி சிக்சருக்கு விளாசினார். இதனால் கொல்கத்தா நைட் ரைடர்ஸ் 19.5 ஓவரில் 7 விக்கெட் இழப்பிற்கு 136 ஓட்டங்கள் எடுத்து டெல்லியை வீழ்த்தி இறுதிப் போட்டிக்கு முன்னேறியது.