நியூசிலாந்து அணியுடன் நடைபெற்றுவரும் டெஸ்ட் சம்பியன்ஷிப் இறுதி போட்டியில் இந்திய அணித் தலைவர் விராட் கோலி ஒரு சில சாதனைகளை முறியடித்துள்ளார்.
இதில் டெஸ்ட் கிரிக்கெட்டில் குறைந்த இன்னிங்ஸில் 7500 ஓட்டங்களை கடந்த நான்காவது இந்திய வீரர் என்ற சாதனையை விராட் கோலி பெற்றுக் கொண்டார்.
இந்தியா, நியூசிலாந்து அணிகளுக்கு இடையிலான உலக டெஸ்ட் சம்பியன்ஷிப் இறுதிப் போட்டி சௌதாம்ப்டனில் ஆரம்பமாகி நடைபெற்று வருகிறது.
இந்தப் போட்டியில் நாணய சுழற்சியை வென்ற நியூசிலாந்து அணித் தலைவர் கேன் வில்லியம்சன் முதலில் பந்துவீச்சை தேர்வு செய்தார்.
சீரற்ற காலநிலைக்கு மத்தியில் முதல் நாளில் நிதானமான ஆட்டத்தை வெளிப்படுத்திய இந்திய அணி, போதியளவு வெளிச்சமின்மை காரணமாக போட்டி நிறுத்தப்படும் போது 58.4 ஓவர்களில் 3 விக்கெட் இழப்புக்கு 134 ஓட்டங்களை எடுத்தது.
இதில் அணித் தலைவர் விராத் கோலி 40 ஓட்டங்களுடனும், ரஹானே 22 ஓட்டங்களுடனும் ஆட்டமிழக்காமல் இருந்தனர்.
இந்த நிலையில், இந்தப் போட்டியின் மூலம் இந்திய அணித் தலைவர் விராட் கோலி சில சாதனைகளுக்கு சொந்தக்காரராகியுள்ளார்.
இந்தப் போட்டி ஆரம்பமாகும் முன்னரே டெஸ்ட் போட்டிகளில் இந்திய அணியை அதிக போட்டிகளில் (61) வழிநடத்திய தலைவர்கள் பட்டியலில், எம்.எஸ் டோனியை பின்னுக்கு தள்ளி கோலி முதலிடத்தை பெற்றுக் கொண்டார்.
அதேபோல, இந்த போட்டியின் மூலம் டெஸ்ட் போட்டிகளில் 7500 ஓட்டங்கள் மைல்கல்லை கோலி எட்டினார். இதன்மூலம் டெஸ்ட் போட்டிகளில் குறைந்த இன்னிங்ஸில் 7500 ஓட்டங்கள் மைல்கல்லை எட்டிய இந்திய வீரர்கள் பட்டியலில் நான்காவது இடத்தை அவர் பெற்றுக் கொண்டார்.
இந்த மைல்கல்லை விராத் கோலியும், சுனில் கவாஸ்கரும் 154ஆவது இன்னிங்ஸில் எட்டியுள்ளனர். அதேபோல, நட்சத்திர வீரர் சச்சின் டெண்டுல்கர் 144 ஆவது இன்னிங்ஸில் இந்த மைல்கல்லை எட்டி முதலிடத்தில் உள்ளார்.
அதுமாத்திரமின்றி, சர்வதேச அளவில் 7,500 ஓட்டங்கள் என்ற மைல்கல்லை அதிவேகமாக எட்டிய வீரர்கள் வரிசையில் 9 ஆவது இடத்தை விராத் கோலி பெற்றுக் கொண்டார்.
இதனிடையே, டெஸ்ட் கிரிக்கெட்டில் 4 ஆவது இடத்தில் களமிறங்கி 6000 ஓட்டங்களை எடுத்த இந்திய வீரர்கள் பட்டியலில் விராட் கோலி, இரண்டாவது வீரராக இடம்பிடித்தார். முதலிடத்தில் சச்சின் டெண்டுல்கர் (13,492) உள்ளார்.
