காபூல் நகரில் குண்டுத் தாக்குதல்: மாணவர்கள் பலர் பலி!

ஆப்கானிஸ்தான் தலைநகர் காபூலில் இன்று இடம்பெற்ற குண்டுத் தாக்குதலில் 19 பேர் கொல்லப்பட்டுள்ளதுடன் பலர் காயமடைந்துள்ளனர்.

காபூல் நகரின் மேற்குப் பகுதியிலுள்ள தஷ்த்-இ-பார்ச்சியில் இயங்கும் பயிற்சி கல்வி மையமொன்றிலேயே இந்த குண்டுத் தாக்குதல் சம்பவம் இடம்பெற்றுள்ளதாக தெரிவிக்கப்படுகின்றது.

தற்கொலை குண்டுத் தாக்குதலாகவே இதனை கருதுவதாக காபூல் பொலிஸார் தெரிவிக்கின்றனர்.

சம்பவத்தின் போது அங்கு 600 வரையான மாணவர்கள் பரீட்சை எழுதிக்கொண்டிருந்தாக காபூல் பொலிஸார் தெரிவித்துள்ளனர்.

இதில் உயிரிழந்த 19 பேரின் சடலங்கள் மீட்கப்பட்டுள்ளதுடன், காயமடைந்தவர்கள் மருத்துவமனையில் அனுமதிக்கப்பட்டுள்ளதாக தெரிவிக்கப்பட்டுள்ளது.
உயிரிழந்தோரில் பெரும்பாலானவர்கள் சிறுமிகள் என்றும் சர்வதேச செய்திகள் தெரிவிக்கின்றன.

இந்த சம்பவத்திற்கு இதுவரையில் எந்தவொரு அமைப்பும் பொறுப்பேற்கவில்லை என்றும் கூறப்பபடுகின்றது.