தடுப்பு மருந்து விநியோகத்தில் தாமதம்: ஐரோப்பிய ஒன்றியம் – அஸ்ட்ராஜெனேகா இழுபறி தொடர்கின்றது!

ஐரோப்பிய ஒன்றியத்துக்கும் அஸ்ட்ராஜெனேகா நிறுவனத்துக்கும் இடையே செய்துகொள்ளப்பட்ட உடன்படிக்கையில், மருந்து தயாரிப்பு தகவல்களை ரகசியமாக வைத்திருப்பதற்கான விதி ஒன்று சேர்த்துக்கொள்ளப்பட்டிருந்தது. எனினும், அந்தத் தகவல்களை வெளியிடுமாறு ஐரோப்பிய ஒன்றியம் இப்போது கோரியுள்ளது.

2021 ஜனவரி-மார்ச் காலப்பகுதியில் ஐரோப்பிய ஒன்றியத்துக்கு விநியோகிக்க உத்தேசித்திருந்த தடுப்பு மருந்து தொகையில் 40 வீதத்திற்கும் குறைவான அளவே விநியோகிக்கப்படும் என்று கடந்த வாரம் தகவல்கள் வெளியாகியிருந்தன.

“பிரிட்டனில் இயங்கும் அஸ்ட்ராஜெனேகா தொழிற்சாலைகள் உற்பத்தியில் சிக்கலை எதிர்கொள்ளாதுள்ள நிலையில், அவையும் எமது உடன்படிக்கையின் அங்கம் என்பதால் அங்கிருந்து மருந்து விநியோகத்தை மேற்கொள்ள முடியும்” என்று ஐரோப்பிய ஒன்றியம் வாதிடுகின்றது.

நேற்று புதன்கிழமை நடத்தப்பட்ட பேச்சுவார்த்தைகளின் முடிவிலும் தீர்வு எட்டப்படாத நிலையிலேயே, உறுதியளிக்கப்பட்டவாறு மருந்து விநியோகத்தை நிறைவேற்றுமாறு ஐரோப்பிய ஒன்றியம் கோரியுள்ளது.

ஐரோப்பிய ஒன்றிய பிரஜைகளுக்கு தடுப்பு மருந்து விரைவில் கிடைப்பதற்காக அஸ்ட்ராஜெனேகாவுடன் தொடர்ந்தும் பேச்சு நடத்தப்படும் என்று ஒன்றியத்தின் சுகாதாரத்துறை ஆணையாளர் தெரிவித்துள்ளார்.

“அடுத்துவரும் மாதங்களில் தடுப்பு மருந்து விநியோகிக்கப்படுவதற்கான வழிமுறை ஒன்றை உருவாக்குவதற்காக தொடர்ந்தும் நெருக்கமாக பணியாற்றிவருவதாக அஸ்ட்ராஜெனேகா நிறுவனத்தின் பேச்சாளர் ஒருவர் தெரிவித்தார்.