நடுக்கடலில் படகு பழுதாகி தத்தளித்துக்கொண்டிருந்த தமிழக மீனவர்களை மீட்ட இலங்கை கடற்படையினர், அவர்களுக்கு தேவையான உதவிகளை வழங்கி படகை சீர் செய்து பத்திரமாக அனுப்பிவைத்துள்ளனர்.
ராமேஸ்வரம் பகுதியை சேர்ந்த மீனவர்கள் 6 பேரே இவ்வாறு தத்தளித்துக்கொண்டிருந்துள்ளனர்.
இவர்கள் விசைப் படகொன்றில் தனுஷ்கோடிக்கும் தலைமன்னாருக்கும் இடையே சனிக்கிழமை இரவு மீன்பிடித்துக் கொண்டிருந்த போது படகு பழுதாகியுள்ளதாக தெரிவிக்கப்படுகின்றது.
இதனால் அவர்களின் படகுக்குள் நீர் புகுந்து, படகு கடலுக்குள் மூழ்கும் அபாயத்தில் இருந்தாகவும் தெரிவிக்கப்படுகின்றது.
இவ்வேளையில் குறித்த படகை அவதானித்த ரோந்து பணியில் ஈடுபட்ட இலங்கை கடற்படையினர், அந்தப் படகில் இருந்தவர்களை மீட்டு அவர்களின் படகை சீர்செய்ய நடவடிக்கை எடுத்துள்ளனர்.
மன்னார் கடற்படை முகாமில் இருந்து தொழில்நுட்ப பிரிவினரை வரவழைத்து படகை சீர்செய்து மீனவர்களை பத்திரமாக அனுப்பி வைத்துள்ளதாக தெரிவிக்கப்படுகின்றது.
இலங்கை கடற்படையினரின் இந்த நடவடிக்கைகளுக்கு தமிழக மீனவர் அமைப்புகள் நன்றிகளை தெரிவித்துள்ளன.
