கொழும்புப் பல்கலைக்கழகத்தின் பட்டமளிப்பு விழாவில் அம்பாறை, அக்கரைப்பற்றை சேர்ந்த தணிகாசலம் தர்ஷிகா 13 தங்கப் பதக்கங்களை பெற்று சாதனை புரிந்துள்ளார்.
இவர் மருத்துவப் பிரிவில் முதற்தர தேர்ச்சி பெற்றுள்ளதுடன், பட்டப்படிப்பு ஆண்டுக்குரிய முதல்நிலையாளராகவும் தெரிவு செய்யப்பட்டுள்ளார்.
இதன்படி மருத்துவ பீடத்தின் பட்டமளிப்பு விழாவின்போது வழங்கப்படும் 37 தங்கப்பதக்கங்களில் சிறந்த மருத்துவ பீட மாணவ விருது உட்பட 13 தங்கப் பதக்கங்களை தர்ஷிகா, தனதாக்கிக் கொண்டார்.
அக்கரைப்பற்று விபுலானந்தா பாலர் பாடசாலையில் ஆரம்ப கல்வியை ஆரம்பித்த இவர் 5ஆம் ஆண்டுவரை அக்கரைப்பற்று இராமகிருஸ்ண மிசன் மகா வித்தியாலயத்திலும் உயர்தரம் வரை அக்கரைப்பற்று ஸ்ரீ இராமகிருஸ்ண தேசிய பாடசாலையிலும் கல்வி பயின்றார்.
பாடசாலை கல்வி சாதனையில் தரம் 5 புலமை பரிசில் பரீட்சையில் சித்தியடைந்ததுடன், க.பொ.த. சாதாரண தரத்தில் ஆங்கில மொழி மூலமாக 8 ஏ, 1 பி பெறுபேற்றை பெற்றுக்கொண்டார்.
தொடர்ந்து இவர், 2012 ஆம் ஆண்டு உயர் தர உயிரியல் விஞ்ஞானப்பிரிவில் 3 ஏ சித்தியுடன் மாவட்ட மட்டத்தில் முதலிடம் மற்றும் தேசிய மட்டத்தில் 4 ஆம் இடம்பெற்று கொழும்புப் பல்கலைக்கழகத்தின் மருத்துவ பீடத்திற்கு தெரிவாகியிருந்தார்.
