யாழ்ப்பாணப் பல்கலைக்கழகத்தின் பட்டமளிப்பு நிகழ்வை நிராகரிப்பதாக யாழ். பல்கலைக்கழக மாணவர் ஒன்றியம் தெரிவித்துள்ளது.
அறிக்கையொன்றை வெளியிட்டு அந்த மாணவர் சங்கம் இது தொடர்பில் தெரிவித்துள்ளது.
யாழ்ப்பாணப் பல்கலைக்கழகத்தின் 35 ஆவது பட்டமளிப்பு விழாவின் இரண்டாவது பகுதி செப்டம்பர் 16, 17, 18 ஆம் திகதியில் நடாத்த திட்டமிடப்பட்டிருந்தது. எனினும் தற்போதைய கொரோனா ஊரடங்கு காரணமாக ஒக்டோபர் 7, 8, 9 ஆம் திகதிகளில் நடாத்துவதற்கு பல்கலைக்கழக நிர்வாகம் தீர்மானித்துள்ளத.
அந்த திகதிகளில் மாணவர்களை நேரில் அழைத்து பட்டமளிப்பை நடாத்துவதற்கு சுகாதார அமைச்சினால் அனுமதி மறுக்கப்பட்டுள்ளது.
இந்நிலையில் அதனை ஒக்டோபர் 7 ஆம் திகதி நிகழ்நிலையில் நடாத்துவதற்கு பல்கலைக்கழக நிர்வாகம் தீர்மானங்களை மேற்கொண்டுள்ளது.
எனினும் இத் தீர்மானம் தொடர்பாக மாணவர்கள் மத்தியில் விருப்பமின்மை காணப்படுகின்றது என்று பல்கலைக்கழக மாணவர் ஒன்றியம் கூறியுள்ளது.
இது தொடர்பாக செப்டம்பர் 15 ஆம் திகதி துணைவேந்தருக்கு கடிதம் மூலம் தாம் தெரிவித்திருந்ததாகவும், ஆனால் துணைவேந்தரிடம் இருந்து சாதகமான பதில்கள் கிடைக்கவில்லை என்றும் அந்த ஒன்றியம் குறிப்பிட்டுள்ளது.
ஆகவே நாடு முழுவதும் வழமைக்கு திரும்பிய பின்னர் நேரடியாக பட்டமளிப்பு விழாவை நடத்துவதற்கே மாணவர்கள் விருப்பம் தெரிவித்துள்ளனர் என்று அவர்கள் கூறியுள்ளனர்.
இதனால் பட்டமளிப்பு விழாவை நிகழ்நிலையில் நடத்தாமல் நேரடியாக மாணவர்களை அழைத்து பட்டமளிப்பு விழாவை நடாத்த யாழ்ப்பாண பல்கலைக்கழக நிர்வாகத்தை கோருகின்றோம் என்று மாணவர் ஒன்றியம் அறிக்கையில் குறிப்பிட்டுள்ளது.
