யாழ்ப்பாணம்,மருதனார்மடம் சந்தியில் இராணுவம்,பொலிஸார் முன்னிலையில் வன்முறைக் கும்பல் ஒன்றினால் ஒருவர் மீது வாள்வெட்டு தாக்குதல் நடத்தப்பட்டுள்ளதனால் அந்தப் பகுதியில் பதற்றநிலை ஏற்பட்டது.
சம்பவத்தில் படுகாயமடைந்தவர் யாழ்.போதனா மருத்துவமனை அதிதீவிர சிகிச்சைப் பிரிவில் அனுமதிக்கப்பட்டுள்ளார்.
இந்தச் சம்பவம் புதன்கிழமை (01)இரவு 7 மணியளவில் இடம்பெற்றுள்ளது.சம்பவத்தையடுத்து பொலிஸார், சிறப்பு அதிரடிப்படையினர் குவிக்கப்பட்டனர்.
மருதனார்மடம் ஆஞ்சநேயர் ஆலயத்துக்கு முன்பாக பழக்கடை நடத்துபவர் மீதே இவ்வாறு வாள்வெட்டு தாக்குதல் நடத்தப்பட்டுள்ளது.
கழுத்து,காலில் பலத்த வெட்டுக்காயங்கள் காணப்படுகின்றன என்று யாழ்.போதனா மருத்துவமனை தகவல்கள் தெரிவித்தன.மோட்டார் சைக்கிள்களில் வந்த 4 பேர் கொண்ட கும்பலே ஊரடங்கு வேளையில் தாக்குதலை நடத்தியுள்ளது.
குறித்த நபர் மீதும் அண்மையில் வாள்வெட்டுத் தாக்குதல் நடத்தப்பட்டுள்ளதுடன், தாக்குதல் நடத்தியோர் விளக்கமறியலில் உள்ள நிலையில், அதே கும்பலைச் சேர்ந்த ஏனையோரால் மீண்டும் இந்த தாக்குதல் நடத்தப்பட்டுள்ளது.
