ஐக்கிய மக்கள் சக்தி மற்றும் எதிர்க்கட்சியின் தலைவர் சஜித் பிரேமதாஸவை மீண்டும் ஐக்கிய தேசியக் கட்சியில் இணைந்துகொள்ள, அக்கட்சி அழைப்பு விடுத்துள்ளது.
ஐக்கிய தேசியக் கட்சியின் இந்த அழைப்புக்கு ஐக்கிய மக்கள் சக்தியின் பொதுச் செயலாளர் ரஞ்சித் மத்தும பண்டார அறிக்கை ஒன்றை வெளியிட்டு, பதிலளித்துள்ளார்.
தேவையான நடவடிக்கைகளின் பின்னர் ஐக்கிய தேசியக் கட்சியினர் ஐக்கிய மக்கள் சக்தியில் நுழைவதற்கான கதவுகள் திறந்திருக்கும் என்று ரஞ்சித் மத்தும பண்டார பதிலளித்துள்ளார்.
“ஐக்கிய தேசியக் கட்சியின் செயற்குழு ஒப்புதலுடன் ஐக்கிய மக்கள் சக்தி உருவாக்கப்பட்டதை இப்போது ஐக்கிய தேசியக் கட்சி மறந்திருந்திருக்கிறது. கடந்த பொதுத் தேர்தலில் ஐக்கிய தேசியக் கட்சியினர் எங்கே இருக்கிறார்கள் என்பதை மக்கள் நிரூபித்துள்ளனர்” என்றும் ஐக்கிய மக்கள் சக்தியின் அறிக்கையில் தெரிவிக்கப்பட்டுள்ளது.
ஐக்கிய தேசியக் கட்சி அதன் பயணத்தை வீழ்ச்சிப் பாதையில் தொடர விரும்பினால், தாம் அதற்கு அனுதாபம் தெரிவிப்பதாகவும் பாராளுமன்ற உறுப்பினர் ரஞ்சித் மத்தும பண்டார குறிப்பிட்டுள்ளார்.
