துபாயில் சிவில் பொறியியலாளராக பணிபுரிந்து வருகின்ற இலங்கையைச் சேர்ந்த ஜே.டி.எஸ் ரசிக்க ‘அபுதாபி பிக் டிக்கட்’ சீட்டிழுப்பில் 15 மில்லியன் திர்ஹமை (81 கோடி இலங்கை ரூபா) பணத்தை முதலாவது பரிசாக வென்றுள்ளார்.
நேற்றைய தினம் ‘அபுதாபி பிக் டிக்கட்’ லொத்தர் சீட்டிழுப்பில் குறித்த இலங்கையர் இவ்வாறு 15 மில்லியன் திர்ஹம் வெற்றியீட்டியுள்ளார் என்று ஐக்கிய அரபு இராச்சியத்தில் வெளியாகும் கலீஜ் டைம்ஸ் பத்திரிகை செய்தியை வெளியிட்டுள்ளது.
213288 என்னும் இலக்கமுடைய லொத்தர் சீட்டிற்கு இந்த ஜாக்பொட் பரிசு கிடைக்கப்பெற்றுள்ளது.
நண்பர்களுடன் வெளியே சென்றிருந்த வேளையில் லொத்தர் சீட்டிழுப்பு ஏற்பாட்டுக்குழுவினர் இந்த வெற்றி குறித்த விபரங்களை தொலைபேசி மூலம் ரசிக்கவிற்கு அறிவித்திருந்தனர்.
துபாயில் கடந்த 16 வருடங்களாக சிவில் பொறியியலாளராக பணிபுரிந்து வருகின்ற ரசிக்க, தன்னுடன் மேலும் எட்டு நண்பர்களை இணைத்துக் கொண்டு இந்த டிக்கட்டை கடந்த மே மாதம் 29 ஆம் திகதி வாங்கியுள்ளார்.
இதனிடையே, குறித்த அதிஷ்ட லாப சீட்டிழுப்பின் 7 ஆவது சுற்று வெற்றியாளராக இலங்கையைச் சேர்ந்த சுலேந்திரன் ராசேந்திரன் தெரிவாகியுள்ளார். அவருக்கு 3 கோடி ரூபா பணப்பரிசு கிடைக்கப் பெற்றுள்ளது.
இதேவேளை, கடந்த மாதம் நடைபெற்ற இதே லொத்தர் சீட்டிலுப்பில் துபாயில் தனியார் நிறுவனமொன்றில் பணிபுரிந்த மொஹமட் மிஷ்பாக் எனும் இலங்கையர் 12 மில்லியன் திர்ஹமை (64 கோடி ரூபா) பணப்பரிசாக வென்றிருந்தமை குறிப்பிடத்தக்கது.
