டுபாயில் ஒரு தனியார் நிறுவனத்தில் விற்பனை துறையில் பணிபுரிந்து வருகின்ற மொஹமட் மிஷ்பாக் (வயது-36) எனும் இலங்கையர் Abu Dhabi Big Ticket சீட்டிழுப்பில் 12 மில்லியன் திர்ஹமை (3.3 மில்லியன் அமெரிக்க டொலர்) பணப்பரிசாக வென்றுள்ளார்.
அவர் வெற்றி பெற்ற பரிசு தொகை இலங்கை பண பெறுமதியில் 64 கோடி ரூபாவாகும் என தெரிவிக்கப்படுகின்றது.
அபுதாபியின் மிகப்பெரிய அதிஷ்டலாப சீட்டிழுப்பு நிகழ்ச்சியான பிக் டிக்கெட் ரேஃபிள் டிரா தொடரின் டிக்கெட் ஒன்றை கடந்த ஏப்ரல் 29 ஆம் திகதி அவர் வாங்கியுள்ளார்.
இந்த நிலையில், அவரது டிக்கெட் எண் 054978 வெற்றியிலக்கமாக அறிவிக்கப்பட்டுள்ளது.
குடும்பத்தினருடன் விடுமுறையை கழிக்க தற்போது இலங்கைக்கு வந்துள்ள அவருக்கு வெற்றி செய்தி தொடர்பான அழைப்பு தன்னுடைய தொலைபேசி ஊடாக வந்ததாக அவர் தெரிவித்துள்ளார்.
இந்த வெற்றிச்சீட்டுக்காக தனது 20 நண்பர்கள் பங்களித்ததாகவும், அதில் தனது பங்கு 600,000 திர்ஹம் ஆகும் எனவும் அவர் தெரிவித்துள்ளார்.
தன்னுடைய தந்தையை ஒரு அறுவை சிகிச்சைக்கு உட்படுத்த வேண்டியுள்ளதால் இந்த சந்தர்ப்பத்தில் இப்பணத்தொகை தனக்கு மிகவும் பயனுள்ளதாக இருக்கும் எனவும் அவர் தெரிவித்துள்ளார்.
அவருடைய மாதாந்த சம்பளம் 7,000 திர்ஹம் என்பதுடன், அவர் கடந்த 10 ஆண்டுகளாக டுபாயில் கடமையாற்றி வந்துள்ளார் என தெரிவிக்கப்படுகின்றது.
தனது 20 நண்பர்களுடன் சேர்ந்து கடந்த ஒன்றரை ஆண்டுகளாக Ahu Dhabi Big டிக்கெட்டை வாங்குவதை மொஹமட் மிஷ்பாக் வழக்கமாக கொண்டுள்ளார்.
இதன்படி, சீட்டிழுப்பின் மூலம் வெற்றி பெற்ற பணத்தின் பெரும் பகுதியை தனது குடும்பத்தின் நிதிப் பிரச்சினைகளை தீர்ப்பதற்கும், தனது இரண்டு குழந்தைகள் மற்றும் மனைவிக்கு ஒரு வீட்டை கட்டுவதற்கும் செலவிடுவதாகவும் அவர் தெரிவித்துள்ளார்.
இதேவேளை, மொஹமட் மிஷ்பாக்கை தவிர, மேலும் இருவர் மில்லியனர்களாக பரிசு வென்றனர். அவர்கள் இருவரும் இந்தியாவிலிருந்து தொழில் நிமித்தம் அபுதாபி சென்றவர்கள் என கூறப்படுகின்றது.
அதில் ஒருவர் 3 மில்லியன் திர்ஹமும், மற்றையவர் 1 மில்லியன் திர்ஹமும் வென்றுள்ளதாகவும் தகவல்கள் வெளியாகியுள்ளது.
