இலங்கையில் அதிகரிக்கும் கொரோனா தொற்றாளர்கள் எண்ணிக்கை: இன்று அதிகமானோர் அடையாளம்!

இலங்கையில் இன்று 1,913 பேர் கொரோனா வைரஸ் தொற்றுடன் அடையாளம் காணப்பட்டுள்ளனர் என்று இராணுவத் தளபதி ஜெனரல் சவேந்திர சில்வா தெரிவித்தார்.

இதுவே இலங்கையில் ஒரே நாளில் அடையாளம் காணப்பட்ட அதிகூடிய எண்ணிக்கையாகும் எனவும் அவர் குறிப்பிட்டார்.

5 நாட்களில் 8 ஆயிரத்து 713 பேர் கொரோனா தொற்றுடன் அடையாளம் காணப்பட்டுள்ளனர்.

இதையடுத்து நாட்டில் கொரோனாத் தொற்றால் பாதிக்கப்பட்டவர்களின் மொத்த எண்ணிக்கை ஒரு இலட்சத்து 13 ஆயிரத்து 666 ஆக உயர்வடைந்துள்ளது.

தொற்றாளர்களில் 98 ஆயிரத்து 209 பேர் குணமடைந்துள்ளனர். 14 ஆயிரத்து 748 பேர் சிகிச்சை பெற்று வருகின்றனர்.

இதேவேளை நாட்டில் கொரோனா தொற்றால் இன்று 13 பேர் உயிரிழந்துள்ளனர். இதன்படி தொற்றால் உயிரிழந்தவர்களின் மொத்த எண்ணிக்கை 709 ஆக அதிகரித்துள்ளது.

உயிரிழந்தவர்களில் 42 முதல் 82 வயதுக்குட்பட்டவர்கள் அடங்குவதுடன் இவர்கள், பொரெல்லை, மாலபே, திவுலபிட்டிய, நிட்டம்புவ, ஜா-எலா, நீர்கொழும்பு, கம்பஹா, பானந்துறை, புலத்சிங்கல, மாவிலமட மற்றும் நுவரலியா உள்ளிட்ட இடங்களில் வசிப்பவர்கள் எனவும் தெரிவிக்கப்பட்டுள்ளது.