இலங்கையில் கொரோனாவுக்கு இன்று நால்வர் பலி

இலங்கையில் கொரோனா வைரஸ் தாக்கத்தால் நால்வர் இன்று உயிரிழந்துள்ளனர் என்று சுகாதார சேவைகள் பணிப்பாளர் நாயகம் அசேல குணவர்தன அறிவித்துள்ளார்.

மூன்று ஆண்களும், ஒரு பெண்ணுமே உயிரிழந்துள்ளனர் எனவும் அவர் கூறியுள்ளார்.

கினிகத்தேன பிரதேசத்தைச் சேர்ந்த 74 வயது ஆண், சியம்பலாபே பிரதேசத்தைச் சேர்ந்த 54 வயது ஆண், கொழும்பு 15ஐச் சேர்ந்த 73 வயது பெண், பண்டாரகம – அட்டலுகம பிரதேசத்தைச் சேர்ந்த 42 வயது ஆண் ஆகியோரே உயிரிழந்துள்ளனர்.

இதையடுத்து கொரோனாத் தொற்றால் உயிரிழந்தவர்களின் மொத்த எண்ணிக்கை 94 ஆக உயர்வடைந்துள்ளது.

மேலும், இலங்கையில் இன்று 459 பேருக்கு கொரோனா வைரஸ் தொற்று உறுதிப்படுத்தப்பட்டுள்ளது என அரச தகவல் திணைக்களம் தெரிவித்துள்ளது.

இதற்கமைய கொரோனாவின் மூன்றாவது அலை மூலம் இதுவரை 17 ஆயிரத்து 433 பேருக்கு வைரஸ் தொற்றியுள்ளது.

இதையடுத்து மொத்தத் தொற்றாளர்களின் எண்ணிக்கை 20 ஆயிரத்து 967 ஆக அதிகரித்துள்ளது. இவர்களில் 14 ஆயிரத்து 962 பேர் குணமடைந்துள்ளனர். 5 ஆயிரத்து 911 பேர் வைத்தியசாலைகளில் சிகிச்சை பெற்று வருகின்றனர்.