இலங்கையில் ஒரே நாளில் 9 பேர் கொரோனாவுக்கு பலியாகியுள்ளனர். இதன்படி, இந்தத் தொற்றால் அதிகப்பேர் பலியான நாளாக சனிக்கிழமை- 21 ஆம் திகதி பதிவாகியுள்ளது.
இலங்கையில் இதுவரை கொரோனாத் தொற்றால் உயிரிழந்தவர்களின் எண்ணிக்கை 83 ஆக அதிகரித்துள்ளது.
உயிரிழந்த 9 பேரும் கொழும்பு மாவட்டத்தைச் சேர்ந்தவர்கள் என்று சுகாதார சேவைகள் பணிப்பாளர் அசேல குணவர்தன அறிவித்துள்ளார்.
கொழும்பு-2 ஐச் சேர்ந்த 52 வயது ஆண், வெல்லம்பிட்டியவைச் சேர்ந்த 65 வயது ஆண் மற்றும் 75 வயது பெண், தெமட்டகொட பகுதியைச் சேர்ந்த 89 வயது ஆண், கொழும்பு-10 ஐச் சேர்ந்த 48 வயது பெண் மற்றும் 72 வயது ஆண், கொழும்பு-13 ஐச் சேர்ந்த 69 வயது பெண், வெள்ளவத்தையைச் சேர்ந்த 76 வயது ஆண், பிரதேசம் குறிப்பிடப்படாத 76 வயது பெண் ஆகியோரே இவ்வாறு உயிரிழந்துள்ளனர்.
இவர்களில் 3 பேர் வீடுகளிலேயே உயிரிழந்துள்ளனர் என்றும் சுகாதார சேவைகள் பணிப்பாளர் மேலும் தெரிவித்துள்ளார்.
