Photo: Twitter/ICC
டி-20 உலகக் கிண்ணத் தொடரில் ஆப்கானிஸ்தானுக்கு எதிரான சுப்பர் 12 சுற்று லீக் போட்டியில் நியூசிலாந்து அணி 8 விக்கெட் வித்தியாசத்தில் வெற்றிபெற்று அரையிறுதிச் சுற்றுக்கு முன்னேறியது.
டி-20 உலகக் கிண்ணத் தொடரில் இன்று (07) நடைபெற்ற 40ஆவது லீக் போட்டியில் ஆப்கானிஸ்தான் – நியூசிலாந்து அணிகள் மோதின. இதில் நாணய சுழற்சியில் வென்ற ஆப்கானிஸ்தான் அணி முதலில் துடுப்பாட்டத்தை தேர்வு செய்தது.
அதன்படி களமிறங்கிய ஆப்கானிஸ்தான் அணி நஜிபுல்லா சத்ரானின் அதிரடியான அரைசச்தத்தால் 20 ஓவர்கள் முடிவில் 7 விக்கெட் இழப்பிற்கு 124 ஓட்டங்களை எடுத்தது. இதில் அதிகபட்சமாக சத்ரான் 73 ஓட்டங்களை எடுத்தார்.
நியூசிலாந்து அணி தரப்பில் ட்ரெண்ட் போல்ட் 3 விக்கெட்டுகளை வீழ்த்தினார்.
இதையடுத்து எளிய இலக்கை துரத்திய நியூசிலாந்து அணி, 18.1 ஓவர்களில் 2 விக்கெட்டுக்களை மாத்திரம் இழந்து வெற்றியிலக்கை அடைந்தது.
இறுதியில் 8 விக்கெட் வித்தியாசத்தில் வெற்றியீட்டிய நியூசிலாந்து அணி, குழு 2இல் இருந்து 2ஆவது அணியாக அரை இறுதிக்கு முன்னேறியது.
மறுபுறத்தில் இந்திய அணி டி-20 உலகக் கிண்ணத் தொடரில் இருந்து அதிகாரப்பூர்வமாக வெளியேறியது.
இதேவேளை, குழு 1இல் இருந்து இங்கிலாந்து மற்றும் அவுஸ்திரேலிய அணிகள் அரை இறுதிக்கு முன்னேறியுள்ளமை குறிப்பிடத்தக்கது.
