இங்கிலாந்து அணியில் மீண்டும் அன்டர்சன்

இலங்கைக்கு எதிரான இரண்டாவது டெஸ்ட் போட்டிக்கான இங்கிலாந்து அணி சார்பாக சிரேஸ்ட அனுபவமிக்க வேகப்பந்து வீச்சாளரான ஜேம்ஸ் அன்டர்சன் விளையாடுவார் என அறிவிக்கப்பட்டுள்ளது. அவர் ஸ்டுவர்ட் பிரொட்டுக்கு பதிலாகவே இங்கிலாந்து அணியில் இணைக்கப்பட்டுள்ளார்.

38 வயதுடைய ஜேம்ஸ் அன்டர்சன் தலைசிறந்த வேகப்பந்து வீச்சாளராவார்.அவர் இலங்கைக்கு எதிரான முதல் டெஸ்ட் போட்டியில் இடம்பெறவில்லை. ஆனாலும், இரண்டாவது போட்டியில் அவருக்கு வாய்ப்பளிக்கப்பட்டுள்ளது.

அடுத்ததாக இந்தியாவில் நடைபெறவுள்ள டெஸ்ட் தொடரை இலக்கு வைத்தே தற்போது இங்கிலாந்து அணியில் ஜேம்ஸ் அன்டர்சன் இணைக்கப்பட்டுள்ளார். இலங்கை ஆடுகளங்களில் விளையாடுவது இந்தியாவில் விளையாடுவதற்கான முன்னாயத்தமாகவே கருதப்படுகிறது.

156 டெஸ்ட் போட்டிகளில் இங்கிலாந்து அணியை பிரதிநிதித்துவப்படுத்தியுள்ள ஜேம்ஸ் அன்டர்சன் 291 டெஸ்ட் இன்னிங்ஸ்களில் 600 விக்கெட்டுகளை கைப்பற்றி சாதித்துள்ளார்.

அதிக விக்கெட்டுகளை வீழ்த்திய இங்கிலாந்து வீரராகவும் அவர் திகழ்கின்றார். முதல் டெஸ்ட் போட்டியில் விளையாடிய ஸ்டுவர்ட் பிரொட்டுக்கு ஓய்வளிக்கப்பட்டுள்ளது.