நடிகர் மன்சூர் அலிகான் உடல் நலக்குறைவால் மருத்துவமனையில் அனுமதிக்கப்பட்டுள்ளார்.
சென்னை அமைந்தகரையில் உள்ள தனியார் மருத்துவமனையில் தீவிர சிகிச்சைப் பிரிவில் அனுமதிக்கப்பட்டுள்ளார்.
சிறுநீரகக் கல் பிரச்சினை காரணமாக மன்சூர் அலிகான் அவதிப்பட்டு வந்துள்ளார். இதனையடுத்து தீவிர சிகிச்சைப் பிரிவில் அனுமதிக்கப்பட்டுள்ள அவருக்கு அறுவை சிகிச்சை செய்யவுள்ளதாக தகவல் தெரிவிக்கப்பட்டுள்ளது.
இயக்குநர் ஆர்.கே. செல்வமணி இயக்கிய ‘கேப்டன் பிரபாகரன்’ படத்தில் வில்லனாக நடித்ததன் மூலம் தமிழ் சினிமாவில் முக்கிய வில்லன் நடிகர்களில் ஒருவராக வலம் வந்தவர் தான் நடிகர் மன்சூர் அலிகான்.
இதனையடுத்து ஏராளமான படங்களில் வில்லனாக நடித்தார். சில படங்களில் நாயகனாகவும் நடித்துள்ளார். இவர் காலப்போக்கில் பல படங்களைத் தயாரித்து இயக்கவும் செய்துள்ளார்.
அரசியலில் ஏற்பட்ட ஆர்வத்தால் நாம் தமிழர் கட்சியில் இணைந்து கடந்த மக்களவைத் தேர்தலில் திண்டுக்கல் தொகுதியில் போட்டியிட்டுத் தோல்வி அடைந்தார்.
பின்னர் நாம் தமிழர் கட்சியிலிருந்து விலகிய மன்சூர் அலிகான் தமிழ் தேசிய புலிகள் என்ற ஒரு கட்சியை தொடங்கி, நடந்து முடிந்த சட்டமன்றத் தேர்தலில் கோவை தொண்டாமுத்தூர் தொகுதியில் போட்டியிட்டு குறைந்த வாக்குகளைப் பெற்று தோல்வி அடைந்தார்.
