தமிழகத்தில் நடைபெறவுள்ள சட்டமன்றத் தேர்தலில் ஆளும் அதிமுகவின் முதலமைச்சர் வேட்பாளராக எடப்பாடி பழனிசாமி அறிவிக்கப்பட்டுள்ளார்.
அதிமுக தலைமையகத்தில் இன்று இடம்பெற்ற செய்தியாளர் மாநாட்டில் முதலமைச்சர் எடப்பாடி பழனிச்சாமி, துணை முதலமைச்சர் ஓ.பன்னீர் செல்வம் இருவரும் இணைந்து இந்த முடிவை அறிவித்தனர்.
கட்சியை வழி நடத்த 11 பேர் கொண்ட குழுவையும் இந்த செய்தியாளர் சந்திப்பில் முதலமைச்சர் எடப்பாடி பழனிச்சாமி அறிவித்தார்.
கட்சியின் முடிவிற்கு நிர்வாகிகளும் தொண்டர்களும் தமது ஆதரவை வழங்க வேண்டும் என்று ஓ. பன்னீர் செல்வம் கேட்டுக்கொண்டார்.
கட்சியின் முதலமைச்சர் வேட்பாளர் யார் என்பது குறித்து கடந்த சில வாரங்களாக எடப்பாடி பழனிச்சாமி அணிக்கும் பன்னீர் செல்வம் அணிக்கும் இடையே முறுகல்நிலை நீடித்துவந்த நிலையிலேயே இந்த அறிவிப்பு வெளியாகியுள்ளது.
முதலமைச்சர் பழனிச்சாமி தனது டுவிட்டர் பக்கத்தில், “அதிமுக முதலமைச்சர் வேட்பாளராக வாய்ப்பு அளித்தமைக்கு எனது நெஞ்சார்ந்த நன்றி” என்று பதிவிட்டுள்ளார்.
“தொண்டர்களின் எண்ணத்திற்கேற்ப அதிமுகவை வளர்ச்சிப் பாதையில் அழைத்துச் செல்ல அயராது உழைப்பேன். அதிமுகவை அடுத்த நூறாண்டுக் காலத்திற்கு வெற்றி இயக்கமாக உருவாக்கிட உறுதி ஏற்கிறேன்” என்றும் அவர் பதிவிட்டுள்ளார்.
