அமெரிக்காவின் நியூயோர்க், ப்ரூக்ளினில் உள்ள சுரங்கப்பாதை ரயில் நிலையத்தில் பயணிகள் மீது மர்ம நபர் ஒருவரால் துப்பாக்கிச் சூடு நடத்தப்பட்டுள்ளது.
இதில் 13 பேர் வரையிலானோர் படுகாயமடைந்துள்ளதாக நியூயோர்க் பொலிஸார் தெரிவித்துள்ளனர்.
காயமடைந்தவர்களில் ஐவரின் நிலைமை கவலைக்கிடமாக உள்ளதாக தெரிவிக்கப்படுகின்றது.
நியூயோர்க் நேரப்படி செவ்வாய்கிழமை காலை 8.30 இந்த சம்பவம் இடம்பெற்றுள்ளது.
கூட்டம் அதிகம் காணப்படும் நேரத்தில் இந்த தாக்குதல் நடத்தப்பட்டதாக கூறப்படுகிறது.
சம்பவத்தின் பின்னர் உடனடியாக அந்த பகுதிக்கு விரைந்த பொலிஸார், தீவிர சோதனை மேற்கொண்டனர்.
இதன்போது அந்த பகுதியில் வெடிபொருட்கள் கண்டுபிடிக்கப்பட்டதாக தகவல்கள் வெளியாகி உள்ளன.
தாக்குதல் நடத்திய சந்தேக நபரை தேடும் பணி தற்போது முடக்கி விடப்பட்டுள்ளது.
சுரங்க ரயில் நிலையத்திலிருந்து புகை பரவியதாக அழைப்பு வந்ததாகவும், சம்பவ இடத்திற்கு வந்து பார்த்தபோது துப்பாக்கி சூட்டில் காயமடைந்தவர்களை கண்டதாகவும் தீயணைப்பு வீரர்கள் தெரிவித்துள்ளனர்.
தற்போது நியூயோர்க் நகரின் பாதுகாப்பு பலப்படுத்தப்பட்டுள்ளதாக சர்வதேச செய்திகள் தெரிவிக்கின்றன.
