இலங்கையில் பயங்கரவாதத் தடுப்பு (தற்காலிக ஏற்பாடுகள்) சட்டத்தின் கீழ் தடை செய்யப்பட்டிருந்த 5 இஸ்லாமிய அமைப்புகள் மீதான தடைகளை நீக்க அரசாங்கம் நடவடிக்கை எடுத்துள்ளது.
ஜுலை 26 ஆம் திகதி பாதுகாப்பு அமைச்சினால் வெளியிடப்பட்ட விசேட வர்த்தமானி அறிவித்தலில் இந்த தடை நீக்கம் தொடர்பில் குறிப்பிடப்பட்டுள்ளது.
அதன்படி, தெளஹீத் அமைப்புக்களாக அறியப்படும், ஐக்கிய தௌஹீத் (தௌஹீத்) ஜமாஅத் (யூ.டி.ஜே.), சிலோன் தௌஹீத் (தௌஹீத்) ஜமாஅத் (சி.டி.ஜே.), ஸ்ரீலங்கா தௌஹீத் (தௌஹீத்) ஜமாஅத் (எஸ்.எல்.டி.ஜே.), அகில இலங்கை தௌஹீத் (தௌஹீத்) ஜமாஅத் (ஏ.சி.டி.ஜே.), ஜம்மியதுல் அன்ஸாரி சுன்னதுல் மொஹமதியா (ஜே.ஏ.எஸ்.எம்.) ஆகியவற்றின் மீதான தடைகள் தளர்த்தப்பட்டுள்ளன.
உயிர்த்த ஞாயிறு தாக்குதல் சம்பவத்தை தொடர்ந்து பல்வேறு அமைப்புகளுக்கு இலங்கையில் அரசாங்கம் தடை விதித்திருந்தது.
இதன்படி 2021 ஏப்ரல் 13 ஆம் திகதி வெளியிடப்பட்ட 2223/3 ஆம் இலக்க வர்த்தமானி அறிவித்தலுக்கு அமைய 11 இஸ்லாமிய அமைப்புகளுக்கு தடை விதிக்கப்பட்டிருந்தமை குறிப்பிடத்தக்கது.
